Sot, Komiteti i Parlamentit Evropian për Liritë Civile, Drejtësi dhe Çështjet e Brendshme (LIBE) votoi pro liberalizimit të vizave pë Kosovën.

Tashmë ka mbetur vetëm edhe një votim në seancën e Parlamentit Evropian, i cili do të mbahet më 18 prill të këtij viti.

Pas këtij lajmi, ka reaguar zëvendëskryeministri i Kosovës, Besnik Bislimi, i cili ka thënë se pritjes së gjatë të qytetarëve të Kosovës, po i vjen fundi.

Sipas tij, nga një janari i vitit 2024, qytetarët e Kosovës, do të udhëtojnë pa viza në zonën Shengen.

“Në përfundim të këtyre procedurave të fundit, qytetarët e Kosovës do të mund të lëvizin pa viza, jo më larg se 1 janari i vitit 2024, duke i dhënë kështu fund një pritjeje të gjatë”, ka shkruar ai, përcjell arbresh.info.

Postimi i plotë i zëvendëskryeministri Bislimi:

Edhe një votim i fundit ka mbetur, në përmbylljen e procedurave për liberalizimin e vizave.

Pas votimit të Këshillit të Ministrave të BE-së me 9 mars, Komiteti i Parlamentit Evropian për Liritë Civile,

Drejtësi dhe Çështjet e Brendshme (LIBE) votoi ditën e sotme tekstin që Kosovës t’i hiqet regjimi i vizave, duke hapur kështu rrugën pёr votimin e fundit të mbetur nё seancën plenare tё Parlamentit Evropian.

Pas hapit të fundit në seancën e Parlamentit Evropian, i cili pritet të mbahet me 18 prill, do të mbetet vetëm nënshkrimi dhe publikimi në gazetën zyrtare të BE-së.

Në përfundim të këtyre procedurave të fundit, qytetarët e Kosovës do të mund të lëvizin pa viza, jo më larg se 1 janari i vitit 2024, duke i dhënë kështu fund një pritjeje të gjatë.